Nasapwan kaina sang kaagahon sang pila ka mananagat ang bangkay sang kaangay nga mangingisda nga namissing kahapon sa bahin sang Sitio Del Pilar, Brgy. Old Poblacion, Escalante City.
Ang biktima ang ginkilala nga si Silverio Bradecina, 49 anyos, kasado, residente sang Sitio Cubay, Brgy. Malasibog, Escalante City.
Sa inisyal nga impormasyon gikan sa Escalante City Police Station, ang pagkasapo sang bangkay ang nareport alas-3:21 kaina sang kaagahon paagi sa pagtawag sa 911 hotline.
Apang sa pag-abot sang kapulisan, napatakas na sang pila ka mangingisda ang lawas sang biktima.
Sa inisyal nga imbestigasyon, ang bangkay ang nasapwan sang parehas man sini nga mangingisda nga sanday Alyas Arnel, 42 anyos, residente sang Sitio Del Pilar, Brgy Old Poblacion, Escalante City; Alyas Joemarie, 38 anyos; kag Alyas Rogelio, 52 anyos, lunsay residente sang Sitio Zumbria, Brgy. Alimango, Escalante City; Alyas Franmer, 38 anyos, residente sang Prk Ipil-Ipil, Brgy. Vito, Sagay City; kag Alyas YanYan, 34 anyos, residente sang Sitio Proper Washington, Brgy. Washington, Escalante City.
Suno sa mga mangingisda, nakita nila nga naga-utaw utaw ang bangkay katupad sang fish cage sang Marañon family kapin ala-1:00 sang kaagahon kag gilayon nila ini nga gindala sa takas.
Sa karun padayun ang imbestigasyon sang Escalante City Police Station, kag sila ang nagrequest naman sang post-mortem examination agud matumod ang matuod nga rasun sang kamatayon sang biktima.
