Naclaim na sang pamilya ang napatay nga menor de edad samtang nagakabit sa linya sang kuryente sa Barangay Zone 2, ciudad sang Cadiz, Negros Occidental sang Biyernes sang kaagahon, Mayo 17.
Sa interview sang Bombo Radyo Bacolod kay Police Lt. Gina Fernandez, Deputy Chief of Police sang Cadiz City Police Station, may yara sang nagpadulong nga iloy sa punerarya kag natumod nga anak sini ang nakuryente.
Suno kay Fernandez, ginkuha man sang pamilya ang bangkay sang menor de edad.
Suno diri, mahimo nga matuod ang report nga mangawat ini sang kable sang kuryente bangud may dala ini nga cutter.
Ang biktima ang residente sang Barangay Tinampa-an, Cadiz City, Negros Occidental.
Wala man sang record ang menor de edad sa police station nga isa ini sa mga nagapangawat apang ginpahayag sang iloy sini nga masami nagalagaw kag gab-i nagapauli.
Panugyan ni Fernandez nga likawan ang pagpanghilabot sa mga bagay nga wala ginapanag-iyahan agud nga malikawan ang disgrasya.
