Nakaabot na sa Negros Occidental ang bangkay ni Leah Mosquera gikan sa Israel.
Madumduman nga ang 49 anyos nga Negrense Caregiver ang isa sa mga biktima sang missile strike sang Iran sa Israel sang Hunyo 15.
Siya ang ginbulong sa ospital sa sulod sang 28 ka adlaw, kag nagtaliwan sang Hulyo 13.
Kaina kapin alas-6:00 sang aga, nag-abot sa Bacolod-Silay International Airport ang bangkay ni Leah.
Nagsugata sa airport ang mga personnel sang Department of Migrant Workers, Overseas Workers Welfare Administration, Governor Eugenio Jose “Bong” Lacson kag ang katapo sang Pamilya Mosquera.
Nagpasalig si Lacson nga ginapreparar na sang provincial government ang budget sa paghatag sang ginabanta P190,000 nga financial assistance sa nalisdan nga pamilya.
Pasalig man sini nga bukas permi ang helpdesk sang probinsya para sa mga Negrense nga yara sa abroad.
Samtang nagapakig-unong man ang OWWA, nga ginrepresentar ni OWWA Region 6 Director James Mendiola sa nalisdan nga pamilya.
Sila ang nag-upod man sa pagbyahe sang bangkay paagi sa St. Jude’s Funeral Services pabalik sa iya hometown sa banwa sang San Enrique.
Suno kay Mendiola, ang OWWA kaupod sa DMW ang magasabat sang burial kag funeral services ni Leah, kag yara man sila tubtob sa haya.
Paathag sini nga derektiba mismo ni President Ferdinand “Bongbong” Marcos Jr. nga seguruhon nga mahatagan sang bulig ang pamilya.
Suno diri may 1,712 nga overseas Filipino workers sa Western Visayas nga yara sa Israel, kun sa diin 210 diri ang Negrense.
Nagalaom man ini nga magatahaw na ang risgo sa Israel sa pagpanaog sa Alert Level No. 2.
