Ipauli na ang bangkay sang Negrense caregiver nga napatay sa pag-atake sang Iran sa Israel sang Hunyo 15.
Ang biktima nga si Leah Mosquera, 49 anyos, ang tumandok sang Barangay Guintoliran, San Enrique, Negros Occidental.
Sa interview sang Bombo Radyo Bacolod kay May Joy Mosquera, manghod sang biktima, malapit nalang makapauli ang lawas sang iya utod.
Sa karun si May Joy ang yara na sa Manila, kag ginahulat na lamang maka-abot ang lawas sang iya manghod agud sila ang upod nga magbalik sa Negros Occidental.
Nagtulo man ang luya sini sa pagsaysay sa natabo, bangod suno sa iya magkaupod sila sa apartment ni Leah.
Apang natabuan nga wala ini ginsugtan nga magpauli sang bata sang iya ginabantayan nga tigulang, gani si Leah lamang kag ang tatlo nila ka abyan ang nabilin sa apartment.
Suno diri, alas-2:00 sang kaagahon sang maghuni ang siren apang wala nila mabatian bangod sa mahamook nga tulog.
Nabugtawan nila ang ikaduha nga alarm, apang pagbukas ni Leah sang piyertahan amo naman ang pagsigabong sang missile.
Pilason man ang tatlo nila nga abyan apang nakasalbar, samtang si Leah ang natampukan sang mga debris kag nag-agom sang lung injury.
Ginalantaw ni Leah nga kun siya ang nakapauli, mahimo nga nakabulig ini agud marescue ang iya manghod, ukon siya ang kaupod man nga napatay.
Nacommatose ang biktima, kag ginpaidalom sa surgery, kun sa diin ini ang nakamuklat pa 10 ka adlaw matapos sang surgery.
Naglaom na si May Joy nga makarecover na ang iya utod bangod ini ang nakamuklat na, apisar nga indi pa makahambal.
Apang ini ang nadulaan sang kabuhi sang Hulyo 13.
Nakabatun man sila sang bulig gikan sa Israeli government, Philippine Embassy sa Israel, Overseas Worker Welfare Administration kag Department of Migrant Workers sa pag-asikaso sa pagpauli sang bangkay.
Samtang ang iban pa nga bulig ang wala pa niya maasikaso bangod sa kasakuon.
Suno diri, matapos ang lubong, siya ang magabalik pa sa Israel agud tapuson ang kontrata sa gina-alagaan sini nga tigulang sa nakaligad nga 13 ka tuig, kag nagdesisyon na nga diri na lamang mangabuhi sa Pilipinas.
