Wala pa naclaim sang pamilya ang bangkay sang gina-alegar miyembro sang New People’s Army nga napatay sa engkwentro batok sa 62nd Infantry Battalion sang Philippine Army sa Sitio Ngalan, Brgy Trinidad, Guihulngan City, Negros Oriental alas-7:30 sang aga sang Marso 17, 2026.
Sa interview sang Bombo Radyo kay Brigadier General Ted Dumusmog, Commander sang 303rd Infantry Brigade, ang engkwentro batok sa ginabanta tatlo ka rebelde ang naglawig lamamg sa sulod sang duha ka minutos kag gilayon nga nalagyo ang mga NPA sa naaminhan-nakatungdan nga dereksyon.
Suno diri, sang Marso 18, alas- 4:30 sang hapon may nasapwan nga bangkay sa Sitio Inangaw, Brgy Macagahay, Moises Padilla, Negros Occidental kag ginkilala ang napatay nga si Edgar Tingting alyas Pagat, miyembro sang Central Negros 1, nga amo ang naka-engkwentro sang Intelligence platoon sang 62nd IB.
Suno kay Dumusmog, posible nga indi na mabulong si Pagat amo nga ginbilin na lang ini sang iya kaupdanan kag bangod nga nagadali sila malagyo, nabilin ang pila ka mga armas nga ginalakipan sang KG9 semi-automatic pistol, duha ka magazine sang KG9 nga may 14 ka bala, kag duha ka empty shells sang 9mm ammunition.
