Ginclaim na sang pamilya ang bangkay sang napatay nga katapo sang New People’s Army (NPA) sa Sitio Bugo, Barangay Buenavista, Himamaylan City, Negros Occidental matapos sang nangin engkwentro batok sa militar sadtong Mayo 26 sang hapon.
Suno kay Army Major Cenon Pancito III, spokesperson sang 3rd Infantry Division sang Philippine Army, ang napatay nga anay rebelde ang ginkilala kay Jose Encancion alias Kurikoy ukon Junjun, residente sa Sitio Candi-is, Barangay Buenavista, nga katapo sang Sandatahang Yunit Propaganda (SYP) 1- Central Negros 2 sang Kilusang Rehiyong Negros, Cebu, Bohon at Siquijor.
Madumduman nga sang tinalikdan, ang alyas sang biktima palang ang napagwa sang mga kapulisan bangod standard operative procedure (SOP) na nila nga indi pag-ipagwa ang identity sang mga anay rebelde tubtob wala pa may nagclaim nga pamilya.
Suno kay Pancito, personal nga ginpadulungan sang mga himata ang bangkay sa morgue sang Biyernes, Mayo 28 agud nga kumpirmahon.
Apang sa karun, wala pa sang impormasyon si Pancito kun gindala pauli sang mga himata ang bangkay ukon ang local government unit (LGU) na ang magapalubong diri sa presensya sang iya pamilya.
