Naclaim na sang iya pamilya ang bangkay sang isa ka 25-anyos nga katapo sang New People’s Army matapos napatay sa engkwentro batok sa mga suldado sa Barangay Amin, Isabela, Negros Occidental, Miyerkules sang aga.
Madumduman nga duha ka mga rebelde ang nadulaan sang kabuhi sa nasambit nga engkwentro kun sa diin una nga naidentify si Virgilio Marco Tamban alyas “Bedam” nga residente sa Sitio Casingan, Barangay Mani-ak, Guihulngan City, Negros Oriental nga gintumod sang iya mismo pamilya samtang kahapon, gin-identify kag naclaim naman sang iya utod si Ben Jack ‘Ka Yuhan’ Rueles alyas “Ka Yuhan”, residente sang Barangay Jonobjonob, Escalante City.
Sa interview sang Bombo Radyo kay 303rd Infantry Brigade commander Brigadier General Inocencio Pasaporte, si Rueles, 25 anyos kag kasado, ang gin-identify kag ginkilala sang iya utod.
Samtang, suno kay Pasaporte, yara naman sa estable nga kondisyon ang duha ka mga suldado nga napilasan sa engkwentro.
Suno sa iya, nagapadayon man sa karun ang pagpatigayon sang mga militar sang combat operations sa Barangay Amin, Isabela.
