BACOLOD CITY–Nakapauli na kahapon sang aga sa probinsya ang bangkay sang pinuno sang Western Visayas Regional Mobile Force Reconnaissance Company nga napatay matapos matiruhan sang rebelde nga grupo sa natabo nga engkwentro sa Zone 7, Barangay Aglobong, Janiuay, Iloilo.
Ginbantayan sang mga katapo sang Regional Mobile Force kag iban pa nga kapulisan kalakip na sanday Bacolod City Police Office Spokesman Police Lieutenant Colonel Ariel Pico kag BCPO Director Police Colonel Henry Biñas ang pagdungka sang barko sakay ang funeral car ni Police Captain Efren Espanto Jr. sa Banago Port kaina.
Upod ang nagkalain-lain nga salakyan sa mga pulis, nagpadulong ang funeral car sa Baxter Funeral Homes, Bago City kun sa diin ginhaya si Espanto.
Nahibaluan nga ang pinuno ang tumandok sang Bago City apang bangud taga-La Carlota City ang iya nga napangasawa, didto siya ilubong sa Pebrero 29.
