Yara na sa punerarya ang bangkay sang police personnel nga napatay sa engkwentro nga nagluntad sa Brgy. Menchanca banwa sang Calatrava, Negros Occidental kahapon.
Ginkilala ang biktima nga si Police Senior Master Sergeant Rommel Aguilar nga na-assign 3rd Maneuver Platoon sang 1st Negros Occidental Provincial Mobile Force Company.
Suno kay Negros Occidental Police Provincial Office Spokesperson Police Captain Judesses Catalogo, may nagluntad nga shooting incident sa Barangay Dolis alas- 7:05 sang aga kun sa diin patay ang 58 anyos nga mangunguma matapos ginluthang sang anum ka armado ka lalaki.
Samtang, alas- 10:50 sang aga, maserbe kun tani sang warrant of arrest ang 1st Negros Occidental Provincial Mobile Force Company sa Brgy. Menchaca apang naengkwentro nila ang armado nga grupo nga ginapatihan amo man ang mga suspek nga nagluthang sa mangunguma.
May natabo nga pagbaylohanay sang lupok tubtob nga nag-disperse ang mga katapo sang NOCPMFC apang namissing si Aguilar.
Alas- 12:30 sang udto nakabaton sang report ang Calatrava Municipal Police Station nga may bangkay nga nasapwan sa Brgy. Laga-an kag nakumpirmar nga amo si Aguilar.
Samtang, nagpagwa na sang statement ang rebelde nga grupo nga sila mismo ang nagpatay kay Aguilar.
Padayon ang imbestigasyon sa pagpatay sa police personnel nga si Police Senior Master Sergeant Rommel Aguilar sa engkwentro nga nagluntad sa banwa sang Calatrava kahapon.
Sa interview sang Bombo Radyo kay Negros Occidental Police Provincial Office Spokesperson Police Captain Judesses Catalogo, ginalauman sini nga makilal-an sang timprano kun sin-o ang suspek nga nagpatay kay Aguilar nga na-assign 3rd Maneuver Platoon sang 1st Negros Occidental Provincial Mobile Force Company.
Suno diri, desidido sila nga pasakaan sang kaso ang suspek agud mahatagan sang hustisya ang kamatayon ni Aguilar.
Samtang, gina-imbestigaran pa sa karun kun ano gid ang natabo kun paano nga nabilin si Aguilar sa lugar.
Pahayag ni Catalogo, nga indi madali magsaka sa lugar kag nagakinahanglan pa sang koordinasyon sa Armed Forces of the Philippines.
