Wala pa sang identity ang nasapwan ang bangkay sang senior citizen nga naga utaw-utaw sa suba sa Prk. Humayan, Brgy. Malubon, ciudad sang Sagay, kahapon, alas 3:00 sang hapon.
Sa interview sang Bombo Radyo Bacolod kay Police Lt. Hanna Mesheil Banquil, Deputy Chief of Police sang Sagay City Police Station, nagreport sa ila nga estasyon ang driver sang dump truck nga si Eduardo Calanza, matapos sini nga makita ang bangkay.
Suno kay Banquil, ang bangkay ang isa ka lalaki, ginabanta nga naga-edad sang 70 anyos, nay kataason nga 5’4, nagasuksok sang yellow nga polo shirt kag blue nga dilargo.
Nagapati naman ang kapulisan nga wala sang foul play kag pagkalumos ang gintunaan sang kamatayon sang bangkay.
Nagapanawagan naman si Banquil sa mga pamilya nga may nadulaan sang himata nga makig-angot sa ila para sa identity sang biktima.
