Nakita na apang wala na sang kabuhi ang 14 anyos nga solterito nga nalunod sang Domingo, Setyembre 14, sa Campomanes Bay sa Barangay Maricalum, ciudad sang Sipalay, Negros Occidental.
Sa interview sang Bombo Radyo Bacolod kay Dionelo Bogtae, Executive Assistant For Operations sang Sipalay City, ginkumpirmar sini nga nakita na ang namissing nga 14 anyos kagab-i, Setyembre 17.
Suno kay Bogtae, nakita ang bata sang crew sang isa ka tug boat nga nagdock sa pantalan sa bahin sang Campomanes Bay alas-7:45 kagab-i.
Suno diri, nagautaw-utaw ang bangkay sang 14 anyos sang masapwan.
Pasado alas-8:00 kagab-i nadala sa takas ang bangkay kag gindala sa punerarya sa ciudad sang Sipalay.
Yara man ang presensya sang pamilya sang biktima sang ini ang nakita kag gindala sa punerarya.
Samtang sa pihak nga bahin, nagpatigayon naman sang evacuation sa pila ka mga lugar sa nasambit nga ciudad matapos nga ginbaha bangud sa nagapadayon nga pag-ulan dala sang Habagat nga ginpabaskog sang Bagyo.
