Tul-an na sang nasapwan sang isa ka nagapangita sang tangkong ang lawas sang tawo nga ginsulod sa sako sa Barangay Damsite, Murcia, Negros Occidental.
Sa interview sang Bombo Radyo Bacolod kay Police Staff Sergeant Edwin Celiz, duty investigator sang Murcia Municipal Police Station, ginpadulungan nila ang lugar kun sa diin ginreport nga nasapwan ang sako nga may unod nga tul-an sang nagakaagnas nga bangkay sang tawo.
Suno kay Celiz, malayo sa mga balay ang lugar kun sa diin nakita ni Ernesto Fernando kag residente sang Purok Violeta, Barangay Cansilayan, Murcia, Negros Occidental ang tul-an sang tawo nga nasulod sa sako.
Suno sa imbestigador, nagapangit sang tangkong si Fernando sang nakibot ini nga may nakita nga tul-an sang kamot kag sa unhan nakita ang sako kun sa diin nasulod ang lawas sang tawo nga nagakaagnas.
Ginpahayag man ni Celiz nga mahimo nga gintangab sang ido ang tul-an gani ara na ini sagwa sang sako.
Suno diri, ang nasambit nga lugar ang indi man halabuyan sang basura apang may pila ka mga tawo nga nagahaboy diri sang basura.
Suno sa imbestigador sa higad lamang sang dalan ginhaboy ang sako nga ginsudlan sang lawas sang tawo nga nagakaagnas na apang indi ini makita gilalayon bangud ini ang naupod sa mga ginhaboy nga mga basura kag napalibutan sang hilamon.
Ang sako ang wala na ginbuksan bangud gindala na ini sa Lourdes Funeral Homes sa banwa sang Murcia kag ini ang natalana nga ipaidalom sa skeletal examination sa Scene of the Crime Operation (SOCO) agud nga mahibaluan kun babayi ukon lalaki ini.
Ginabanta isa na ka bulan sang gintagbong sa nasambit nga lugar ang lawas sang tawo nga nakasulod sa sako.
