Bangud lang sa pasibangod sa pagpanghiwit, patay ang mag-amay sa Sitio Nasanagan, Brgy. Bi-ao, banwa sang Binalbagan, Negros Occidental matapos gintiro sang mag-utod kahapon sang udto.
Sa interview sang Bombo Radyo Bacolod kay Police Major Fernando Somblingo, hepe sang Binalbagan Municipal Police Station, nagapati ang duha ka mga suspetsado nga sanday Jomar kag Alyas Negro Salvador nga napatay ang ila amay bangud ginhiwitan ni Crisanto Espante Sr. nga residente sang Sitio Dinapit, Barangay Bi-ao.
Ang amay nga Salvador ang napatay matapos maghabok ang iya tiyan.
Nagkomprontahanay ang iloy nga Salvador kag asawa ni Espante Sr. kag napadapatan sang kamot ni Crisanto Espante Jr. ang iloy nga Salvador.
Bangud sini, nasuya ang mga suspetsado kag ila ginbangga-an ang mag-amay nga Espante kag gintiro tubtub mapatay.
Suno sa hepe, .45 caliber pistol kag .38 caliber revolver ang armas nga gingamit sang mga suspetsado kag kaupod man sang mga ini sa pagkomiter sang krimen ang bayaw nila nga ginkilala kay alyas Junjie kag isa ka John Doe.
Matapos ang krimen, nagpadulong ang mga suspetsado sa nabukid nga bahin sang Kabankalan City, Negros Occidental.
Sa karun nagapadayon ang man-hunt operation sang Binalbagan Municipal Police Station sa mga suspetsado kag nakahatag naman ang mga ini sang impormasyon sa mga asset sini sa kabukiran.
