Bangud sa kahadlok nga mautdan sang ulo, boluntaryo nga nagsungka sa mga pulis ang tatlo ka mga lalaki sa Barangay Mansilingan, ciudad sang Bacolod nga nagapangatubang sang kaso nga robbery.
Sa interview sang Bombo Radyo kay Police Capt. Elmer Bonilla, station commander sang Bacolod Police Station 7, nabatian sang ginaalegar lider sang grupo nga si Eugene Sarmiento, 28-anyos kag residente sang Purok Langka, Barangay Mansilingan nga may ginpugutan sang ulo gani nagsungka ini sa bulig sang mga barangay officials sang Mansilingan sang Setyembre 2 sang aga.
Sang nabalitaan sang mag-utod nga Alimonia nga kaupod ni Sarmiento nga ginkasuhan, nagpaupod man sila sa ila amay kag nagpadulong sa balay sang isa ka barangay kagawad sang Setyembre 2 sang gab-i.
Diri na ginsugat sang Police Station 7 si Jomar Alimonia, 21-anyos kag residente sang Purok Leonville, Barangay Mansilingan kag ang iya manghod nga menor de edad.
Gilayon naman nga ginturnover sa Social Development Center ang minor nga Alimonia.
Suno kay Bonilla, suspetsado ang tatlo sa pagpangsulod sang balay sa Mansilingan kun sa diin ila nga ginakawat ang mga appliances kag sila ang ginkasuhan duha na ka bulan ang nakaligad.
Sang tinalikdan nga semana, naggwa ang warrant of arrest batok sa mga ini.
Wala man sang pangalan ang grupo sang tatlo apang mahimo nga naghagaday ang mga ini nga mangawat.
Kadungan sang ila pagsungka, nagpanawagan si Bonilla sa mga nabiktima sang kawatan nga magpadulong sa police station agud mapasakaan sila sang dugang nga kaso.
