Padayon pa nga ginapangita sang mga kapulisan ang tricycle driver nga nagtiro-patay sa 21 anyos nga biktima sa Hacienda San Antonio, Brgy. Mabini, Cadiz City, sang Sabado sang hapon.
Ginkilala ang biktima nga si Jay Roze, lalaki nga residente sang Hacienda San Fiel, Brgy. Mabini, Cadiz City.
Samtang ang suspect amo si alyas “Eddie”, lalaki, 42 -anyos kag residente ang Hacienda San Antonio sa nasambit nga brgy.
Sa interview sang Bombo Radyo kay PLt. Col. Lymel John Pasquin, hepe sang Cadiz City Police Station, samtang nagamaneho si Roze sang iya motorsiklo angkas ang isa menor de edad, nag-overtake ini sa suspect.
Nag-overtake man balik si alyas “Eddie” sa biktima tubtob nga sila ang nag-baisay kag nagbuya-anay sang mga malain nga tinaga.
Bangud sini, gintiro sang suspect si Roze kag na-igo sa dughan nga nagresulta sang iya kamatayon.
Gilayon naman nga nagpalagyo ang suspect matapos ang krimen.
Sa karon, suno kay Pasquin, padayon ang ila hot pursuit operation sa pagdakop sa suspect.
Wala pa matumod ang revolver nga gingamit sa pagtiro sa biktima.
Natumod na ang pangalan sang suspetsado apang wala pa ginabuyagyag sang mga kapulisan ang matuod nga pangalan bangud at large ini kag magkaingod lamang sila sang puluy-an sang biktima.
Ginalantaw nga murder ang kaso nga ipasaka batok sa suspek.
Panawagan ni Pasquin sa mga pumuluyo nga maghatag sang impormasyon sa mga kapulisan kun makita ang suspetsado.
