Indi kumpormi ang Bantay Bigas sa pagpatuman sang P58 nga maximum suggested retail price (SRP) sa imported nga bugas, sa baylo ginapanawagan ang pagbalik sang pagbaligya sang subsidized nga bugas gikan sa National Food Authority (NFA) sa mga merkado.
Sa interview sang Bombo Radyo Bacolod kay Bantay Bigas Spokesperson Cathy Estavillo, kun ano na lamang ang mapinsaran sang gobyerno nga ipatuman apang wala nagapanubo sa presyo sang bugas.
Pahanumdom sini nga ang promisa sang Marcos Administration amo ang mapanubo sa P20 ang kada kilo sang bugas, apang sa baylo doble-doble pa ang nangin pagsaka sa presyo.
May mga nanarisari naman nga ginpatuman kaangay sang Rice for All, Nutri Rice, P29 per kilo kag P30 per kilo nga bugas, nga sa masami mabakal lang sa pipila ka mga Kadiwa centers.
Mag ginbaligya man nga P40 kada kilo sa mga merkado kag bisan sa mga train stations, apang ang nasambitan nga tikang ang wala gid sang epekto sa kabug-usan nga presyohanay sang bugas sa merkado.
Dugang pa nga nakapalala ang Executive Order No. 62 nga nagapanubo sang taripa sa imported nga bugas, apang sa pihak sini nagapabilin nga mataas ang presyo sang bugas sa merkado.
Panindugan ni Estavillo nga rice traders ang nagadikta sang presyo.
Sa ulihi, ang solusyon lamang nga makita sang gobyerno amo ang importasyon, nga naguba sa lokal nga industriya sang bugas kag nagadala sang pag-antos sa mga mangunguma kag konsumedor.
Suno kay Estavillo, mas naglala ang krisis sa pagkaon sa Marcos Administration kun sa diin nagdangat sa all-time high nga 63 percent ang mga nagapahayag nga sila ang pigado, kaangay sa sitwasyon 21 ka tuig na ang nakaligad.
Suno diri, ang mga programa kag polisa sang gobyerno ang “anti-poor” kag para lamang sa pililion nga sektor.
Panawagan sang Bantay Bigas nga imbes importasyon, dapat buligan sang gobyerno ang mga farmers, hatagan sang subsidy, mechineries para sa produksyon kag post harvest facilities.
Suno diri, dapat mabalik man ang mandato sang NFA sa paghatag sang subsidized price sang bugas nga ginabaligya sa merkado.
