Nagpanawagan ang spokesperson sang Bantay Bigas sa mga pumuluyo nga indi na magpainto sa liwat nga promisa sang gobyerno nga maganubo ang presyo sang bugas.
Ini kasunod sang pahayag ni House Speaker Ferdinand Martin Romualdez nga posible magnubo ang presyo sang bugas sang P30.00 kada kilo sa bulan sang Hulyo.
Sa interview sang Bombo Radyo Bacolod kay Cathy Estavillo, makapila na ka beses naintuan ang mga pumuluyo sa wala tupa nga promisa sang gobyerno.
Suno kay Estavillo, matabo lamang ang ginatuyo sang gobyerno nga panubuan ang presyo sang bugas kun mabasura na ang RA 11203 ukon ang Rice Tarrification Law.
Suno diri, dapat man nga matutukan sang gobyerno ang mga dalagko nga problema sa patag sang agrikultura kaangay lamang sang mahal nga production cost kasubong man ang kakulang sang irigasyon.
Dugang pa niya nga indi na mahimo magnubo pa ang presyo sini apisar nga ginabaha kita sang imported rice.
