Nagtukod sang task force nga Bantay Holdupper and Akyat-Bahay ukon BHAB ang Bacolod City Police Office kasunod sa asod-asod nga pagpangawat kag pagpanghold-up sa ciudad sang Bacolod.
Sa interview sang Bombo Radyo kay Police Lt Col Ronnie Brillo, commander sang Bacolod City Mobile Force Company, ang BHAB gintukod para mahatagan sang dedicated personnel kag mafocusan ang insidente sang robbery, holdup kag akyat-bahay.
Suno diri, bangod nagnubo kag nagdutay na lang ang illegal nga druga nga nagasulod sa ciudad, posible nga ang mga drug personalities nga wala na sang makuha nga druga, nagasulod na lang sa pagpangawat.
Ginpatpat man ni Brillo ang trabaho sang BHAB kag ini ginalakipan sang monitoring kag pagkuha sang mga impormasyon kaangay na lamang sa mga indibidwal nga may previous nga kaso may kaangtanan sa pagpangawat kag illegal nga druga.
Nasulod man sa ila trabaho ang pagmonitor sa mga miyembro sang gang, pag-assist sa imbestigasyon sa mga kaangay nga insidente kag pagkoordinar sa pihak nga probinsya sa mga persona nga imbulbado.
