Ginklaro sang Negros Occidental Provincial Election Supervisor nga magapabilin nga area of immediate concern ang banwa sang Binalbagan bisan pa may nagluntad nga ambush sang damlag lang sa Sitio Candida 2, Barangay Biao sa banwa sang Binalbagan sang Pebrero 13.
Madumduman nga gin-ambush sang mga miyembro sang New People’s Army (NPA) ang patrol car sang Binalbagan Municipal Police Station nga nagresulta sa pagkapilas sang duha ka Police Officer kag isa ka sibilyan.
Suno kay Atty Roberto Salazar, magapabilin nga area of immediate concern ang banwa bangod ang pagclassify diri sa status ang bangod man sa presensya sang Communist Terrorist Group (CTG).
Ginatugyan naman sang Commission on Election (Comelec) sa Philippine Army kag Negros Occidental Police Provincial Office (NOCPPO) ang seguridad sang mga local government unit (LGU) nga gintag bilang area of immediate concern.
Ginpahayag naman diri ni NOCPPO Director P/Col. Leo Pamitan nga sa masunod, magakoordinar na lamang sa nga local government officials antes ang mga ini magsite sang mga insidente.
Paathag naman sini nga wala niya na ginatandog ang kaangay nga impormasyon bangod aminado man ini nga sensitibo ini sa Philippine National Police (PNP).
Dugang pa ni Salazar nga kinahanglan man ang pagpakig-angot sa LGU antes iwaragwag nga sila ang ginakabig nga area of immediate concern bangod ini ang magatuga sang malain nga imahe para sa nasambit nga mga lugar.
Madumduman nga magluwas sa banwa sang Binalbagan, anom ang mga LGU sa probinsya nga gintag bilang area of immediate concern.
