Padayun nga naga-aligmat ang banwa sang La Castellana sa posibilidad sang pagluntad sang lahar flow gikan sa Bulkan Kanlaon sa pila ka mga Barangay.
Kalakip sa mga ginabulubantayan ang Barangay Biak-na-bato kag Cabacungan.
Sa interview sang Bombo Radyo Bacolod kay La Castellana Disaster Risk Reduction and Management Office Head John de Asis, ang mga Barangay amo ang naapektuhan sang lahar flow sang maglupok ang bulkan sang Hunyo.
Paathag sini nga nakapatigayon na sang forced evacuation ang mga pumuluyo sa sulod sang 6km radius danger zone, kag bisan pa ang sa Brgy Cabacungan nga 300 tubtob 500 metros pa ang gap gikan sa 6km radius, ila naman nga ginlakip sa evacuation efforts.
Ang mga ini ang napapanaog na kasubong man ang kadam-an sang mga kasapatan antes paman nagpagwa sang lahar advisory ang Phivolcs.
Bangod wala na sang tawo sa ibabaw, aminado si De Asis nga ila salabton kun may matabo sa mga nabilin nga pamalay kaangay sang mahimo makawatan.
Gani magluwas sa peligroso sa ibabaw, ang kapulisan ang naghamtang na sang border checkpoint agud hugot nga mabantayan nga wala sang makasulod sa 6km radius danger zone.
Aminado ini nga indi malikawan ang humanitarian consideration, apang pasalig ni De Asis nga ang mga ini ang gina-log agud kun may kinawatay nga matabo sa ibabaw, ang mga nakalista amo ang nagapanguna nga ma-imbestigaran.
Indi man malikawan nga may nagareklamo sa kahugot sang pagsulundan apang pahanumdom ni De Asis nga ini ang para sa safety sang mga nabilin nga pagkabutang sang mga evacuees.
Sa pihak nga bahin, indi man nila mamonitor ang sitwasyon sa ibabaw bangod wala na sang nagasaka gani indi mapaktan kun may posibilidad nga may matabo nga lahar flow.
Apang sila ang nagapreparar naman, kag dako na nga factor nga wala na sang tawo nga mahimo mahalitan.
May nakastandby naman nga mga heavy equipments gikan sa Department of Public Works and Highways nga magaresponder inkaso kinahanglan.
Samtang yara man ang Philippine Red Cross nga nakahanda nga magbulig.
