Ginpasalig sang alkalde sang banwa sang La Castellana nga sila ang preparado inkaso maglala ang sitwasyon sang Bulkan Kanlaon.
Sa interview sang Bombo Radyo Bacolod kay La Castellana Mayor Rhumyla Nicor Mangilimutan siya ang may balay sa Sitio Mandayao, Barangay Mansalanao, La Castellana nga yara sa 6km radius gikan sa crater sang bulkan.
Aminado ini nga mapanimahuan ang baho sang asupre ukon ashfall depende sa dapya sang hangin.
Panawagan lamang sini sa mga pumuluyo nga mangin alerto kag ipangamuyo nga indi matublag ang Bulkan Kanlaon.
Ginapadulungan man sini ang iban pa nga area malapit sa 4km Permanent Danger Zone kag nagapulupamangkot sang ila kahimtangan.
Indi man malipod nga may-ara sang madamol kag maitom nga aso nga may kaupod nga abo nga nagagwa sa baba sang bulkan santo man sa monitoring sang Phivolcs.
May pipila man ka area nga nakapanimaho sang asupre kag manipis nga ashfall.
Gin-athag ni Mangilimutan nga estrikto sa karun ang pagbantay agud wala sang makasulod sa 4km Permanent Danger Zone.
Sa karun, padayun man ang pagbantay sang banwa sa advisories sang Phivolcs, nga amo man ang pahanumdom sini sa ila mga constituents.
Preparado naman ang Municipal Disaster Risk Reduction and Management Office para sa pagresponder, kag aktibo man ang tagsa ka Punong Barangay samtang ginpasanyog man nila ang kolaborasyon sa mga stakeholders para sa salakyan kag gatong kasubong man sa mga eskwelahan nga kun kis-a ginagamit bilang evacuation site.
Panawagan sang alkalde nga kun may matalupangdan nga baho sang asupre kag ashfall, gilayon nga ireport.
