Naka-eksperyensya sang pagbaha sa pila ka bahin sang banwa sang Manapla kasubong man sa ciudad sang Cadiz kag Victorias bangod sa tayuyon nga mga pag-ulan humalin kagab-i tubtob sang kaagahon.
Nagdangat sa liog ang pagbaha sa Brgy A-1, Manapla, apang sa karun nagtahaw-tahaw naman ang tubig-baha nga yara na lamang sa hawak.
Alas-9:00 kagab-i nagdangat naman sa 10 feet ang tubig sa Malihao river sa ciudad sang Victorias.
Napulo naman ka pamilya ang gin-evacuate ukon 37 ka indibidwal gikan sa Brgy 21, 7 kag 6 kag ang mga evacuees ang temporaryo naman nga ginhamtang sa Coliseum sang ciudad.
Kalakip naman sa mga ginbaha sa Cadiz City ang Uso Housing sa Villa Sagrado, Brgy Burgos kag Hacienda Carmen, Brgy Daga.
Sa interview sang Bombo Radyo Bacolod kay Teresita Domadiego, evacuee gikan sa Uso Housing, siyam sila ang nagapuyo sa isa ka balay, apang ang lima ang una na nga ginkuha sang ila himata.
Sila nga apat nga nabilin ang napilitan naman nga magsaka sa babaw sang atop bangod sa madasig nga pagsaka sang tubig kagab-i.
Nakapanaog lamang ang mga ini sang magtahaw na ang tubig-baha kag sila ang gilayon man nga nagkadto sa evacuation areas.
Nagapanawagan ini sang bulig bangod sila ang wala sang masuksok matapos mabasa ang tanan nila nga pagkabutang, kasubong man tilig-angon bangod nasudlan sang tubig ang ila nga bulugasan.
