Napilian ang banwa sang Murcia, Negros Occidental nga pinal nga pagatukuran sang Police Regional Office – Negros Island Region (PRO-NIR) headquarters.
Ini ang ginkumpirmar ni PNP Chief General Jose Melencio Nartatez Jr. sa hearing sang Senate Finance Subcommittee J para sa proposed 2027 budget sang Department of the Interior and Local Government (DILG) sang Huwebes.
Suno sa PNP Chief General, ang Murcia ang “appropriate” nga pagahamtangan sang headquarters bangud ini ang malapit ciudad sang Bacolod nga hapos sudlon halin sa mga interior kag central nga bahin sang isla sang Negros.
Antes ang pinal nga pagpili sa Murcia, ginpahayag ni Nartatez nga ginkonsiderar man ang iban nga mga lugar sa norte nga bahin sang Negros, kag Kabankalan.
Suno diri, may P505 million nga proposed budget para sa pagpatukod sang regional headquarters kag kun maaprubahan sa Kongreso, ini ang pagasugudan sa masunod nga tuig.
Ang duta ang may 7 hectares nga kapalaparon.
Samtang, ginahulat pa sang PRO-NIR ang Deed of Donation sang lote nga pagatukuran sang ila regional headquarters nga ihamtang sa banwa sang Murcia.
Sa interview sang Bombo Radyo kay PLTCOL Joem Malong, Spokesperson sang PRO-NIR, sa ila conference, ginpresentar na ang development plan para sa lugar, apang kinahanglan pa nga makompleto kag ma-submit ang mga dokumento, ilabi na ang Deed of Donation, agud mangin opisyal ang pagdonar sang lote sa PNP.
Ginkonsiderar man sang PRO NIR sadto nga kun may ara sang magdonar sang duta malapit sa Bacolod, diri nila pagatukuron ang regional headquarters.
Sa pihak nga bahin, ginpahayag ni Malong nga luwas sa headquarters, dapat may location man para sa mga support units.
Ini bangud subong yara pa sa Negros Occidental Police Provincial Office (NOCPPO) ang madamo nga police units, gani gutok kag indi na maka-accommodate.
Ginpahayag ni Malong nga mahimo maglab-ot sa tatlo tubtob lima ka tuig ang pagpatukod sang headquarters bangud madamo pa sang proseso nga pagatapuson antes masugudan ang construction.
Lakip na diri ang lot readiness, soil testing kag iban pa nga technical assessments.
