Ginpasalig ni Murcia Municipal Mayor Gerry Rojas nga sila ang sarang nga makasupply sang 50 million liters per day sa ciudad sang Bacolod, apang kinahanglan lamang nga may magsulod nga investor nga magatukod sang planta.
Sa interview sang Bombo Radyo Bacolod, nagtambong ini sa Water Summit kun sa diin kaupod man sini sanday Talisay City Mayor Niel Lizares kag Bago City Mayor Nicholas Yulo.
Sa diskusyon tuhoy sa pagsolbar sang problema sa tubig sa ciudad sang Bacolod, nagkomiter ini nga ang banwa sang Murcia ang magabulig kag makasupply pa sang 50 million liters per day.
Ini bangod sila ang may-ara sang anom ka ginakuhaan sang spring water, gani sila ang may bastante man nga supply para sa 7,000 households sa banwa.
Sa karun, ang Murcia Water District ang nagahatag sang excess supply nga 3.7 million liters per day sa Bacolod City apang aminado ang alkalde nga ini ang tuman ka gamay.
Paathag ni Mayor Rojas nga sarang sila makahatag sang exclusive supply kun may-ara sang investors nga amo ang magatukod sang gamay nga planta kag makaplastar sang tubo padulong sa ciudad sang Bacolod.
Sa karun may existing na nga pipe nga naga-angot sa tunga sang Murcia Water District kag Bacolod City Water District, apang ini ang para lamang sa gamay nga volume.
Isa sa ginalantaw sini nga pwede mag-invest amo ang BACIWA ukon Prime Water Inc.
Ginplastar naman sini sa Murcia Water District nga sila ang magasulod lamang sa proyekto kun maseguro na ang bastante nga supply para sa mga Murciahanon.
Ang pagpasulod sang investor ang makabulig man sa ekonomiya sang banwa bangod madugangan ang capital sang Murcia Water District nga makapasanyog pa sa ila operations.
