Bangud sa pag-ulan nga dala sang Hanging Habagat kag mas ginpabaskog pa sang Bagyong Ferdie may mga barangay sa pila ka mga Local Government Unit sa Negros Occidental ang ginbaha.
Sa banwa sang Pontevedra, ginpahayag sang alkalde nga may yara sang nag-evacuate bangud sa pagbaha.
Sa interview sang Bombo Radyo Bacolod kay Pontevedra Mayor Jose Maria Alonso, may yara sang 25 ka pamilya nagikan sa Barangay San Juan sa nasambit nga banwa ang nagevacuate bangud sa pagbaha tuga sang madamol nga pag-ulan.// Ang mga ini ang nagatinir sa Barangay Hall kag sa elementary school sang banwa.
Suno kay Alonso magluwas sa Barangay San Juan, may yara man sila sang ginsugat nga mga evacuees nagikan sa Barangay DSB.
Ang mga evacuees ang nahatagan naman sang makaon kag may yara man sang ginhatag nga food packs ang banwa.
Suno kay Alonso, ang banwa ang nagapreparar man kag kun magsige ang malain nga tiyempo mahimo nga madugangan ang mga evacuees kag nagapadayon man sila sa pagmonitor sa lakat sang panahon.
Samtang nagpatigayon naman sang force evacuation sa pila ka mga residente sang banwa sang Valladolid, Negros Occidental bangud sa nagasaka nga level sang tubig bangud man sa pag-ulan dala sang hanging habagat nga mas ginpabaskog sang Bagyong Ferdie.
Sa interview sang Bombo Radyo Bacolod kay Valladolid Municipal Mayor Enrique Miravalles, nagsaka ang level sang tubig sa banwa sang Valladolid kag nagpatuman man sila sang force sa mga residente nga posible maapektuhan sang pagbaha.
Suno kay Miravalles, ginlibot nila ang banwa agud nga tsekyaron ang mga sitwasyon sang mga residente.
Nagtawag naman ini sa provincial government kag may ginhatag nga bugas nga ihatag sa mga residente nga mag-evacuate.
Suno diri ang mga coastal areas ang nalibot man nila kag ginpanugyanan nga mag-upod na sa mga rescuers kun sila ginpaevacuate bangud magluwas sa madamol nga pag-ulan, ginabantayan man ang dako taob.
Dugang pa sang alkalde, dalagko man ang balod sa coastal areas sang banwa.
Ginpasiguro man sang alkalde nga indi man sila pagpabay-an sang ila kinahanglanon sa tion nga mag-evacuate.
