Wala sang may na-engkwentro nga problema ukon untoward incident ang kapulisan sa ila pagbantay sa katapusan nga adlaw sang Bar Exam nga ginpatigayon sa University of Saint La Salle kahapon.
Suno kay Police Major Ritchee Gohee, station commander sang Bacolod Police Station 4, halin kahapon sang kaagahon nakadeploy ang ila mga personnel agud masiguro nga hilway ang pagpatigayon sang pasinawan.
Suno sa iya, ila ginbantayan ang mga naginuha nga mga examinee kag ang mga ginikanan nga magasugat sa mga ini, nga yara sa tabok sang unibersidad nagabantay.
Pasado alas 4:00 sang nagwa ang labing una nga law graduate nga nakatapos sa eksaminasyon.
Suno kay Gohee, nangin matawhay ang ila pagbantay kag wala man sang may na-engkwentro nga problema.
Samtang, ginakabig naman sang isa ka abogado sa Negros Occidental nga mas bentaha sa subong nga batch sang law graduates ang ginpatigayon nga exam bangud indi na sila kinahanglan magpadulong sa Manila agud magkuha sang pasinawan.
Suno kay Atty. Calitis, nga nagpakilala lamang sa iya apelyido, anum ka tuig na ini sa serbisyo kag nakahibalo ini sang kabudlay nga inagyan sang mga nagkuha sang bar exams.
Suno sa iya, bentaha sa ila sa karun nga lapit lamang ang venue kag yara sila sa ila comfort zone.
Nagpabutyag man ini sang suporta pinaagi sa pagpangamuyo kag nagalaom nga malab-ot sang mga ini ang ila mga handom.
Nagalaom naman si Atty. Jomax Ortiz nga mangin mataas ang passing rate sini nga tuig kag mangin tuman ka liberal ang pagcheck bangud nagakinahanglan ang pungsod sang mga abogado.
Suno kay Ortiz, duha ka tuig nga wala nakapatigayon sang pasinawan bangud sa COVID pandemic gani ginakulang gid sa karun ang pungsod sang mga law practitioners.
Naintindihan naman sini kun ngaa tuman ka istrikto ang mga pagsulundan indi lamang sa bar exams kundi sa pagka-abogado bangud maskin gamay lamang nga sala, sarang sila nga makuhaan sang lisensya.
Kahapon, ginpahayag ni Supreme Court Associate Justice kag 2020/21 Bar Examination chairperson Marvic Leonen nga gindisqualify ang pila ka mga bar examinees nga nagbayolar sa Honor Code.
Sa isa ka Bar bulletin nga ginrelease kahapon, ginpahayag ni Leonen nga ang nasambit nga disqualification ang iya prerogative bilang isa ka Bar chairperson.
Suno sa iya, samtang ginapatigayon ang Bar Examinations, nakabaton ang Office of the Bar Chairperson sang mga reports sang mga examinees nga hungod nga nagsulod sa local testing centers nga wala nagpabalo nga sila ang nagpositibo sadto sa COVID-19, nagsmuggle sang ila mga mobile phones sa sulod sang examination rooms kag nag-access sa social media sang sila ang nakalunch break sa sulod sang building.
Bangud sa nasambit nga bayolasyon, gin-exercise sini ang iya prerogative bilang Bar Chairperson agud madisqualify ang nasambit nga mga examinees sa 2020/21 Bar Examinations.
Suno kay Leonen, ang disqualification ang naga-apply lamang sa karun nga examination.
Nagpanawagan man ini sa nasambit nga mga examinees nga magbinag-binag sa ila mga actions.
Suno diri, sarang pa nila nga maislan ang mga ila narratives kag ginhangkat nga magkuha sang leksyon sang ila mga sala kag tinguhaan nga mabalik ang ila mga honor.
Gincongratulate man sini ang tanan nga Bar examinees nga nangin madinalag-on sa pagtapos sang 2020/21 Bar Examinations.
