BACOLOD CITY — May mga imbitasyon na ang Barangay 18 nga magperform sa luwas sang pungsod matapos gindeklarar nga kampeon sa Street Dance and Arena Competitions Barangay Category sang MassKara Festival 2017 sang Oktubre 22.
Sa interview sang Bombo Radyo, ginpahayag ni Punong Barangay Jonathan Diaz nga nakabaton na sila sang sulat nga nagapangagda sa ila nga magperform sa iban nga pungsod apang gin-refer pa ini sa city government bangud kinahanglan ang dako nga pondo para sa ila pagbyahe.
Suno kay Diaz, imbitado sila nga magperform sa Macau, China sa bulan sang Disyembre subong nga tuig kag sa Toronto, Canada sa summer.
Magluwas diri, may isa man ka pribado nga kumpaniya sa Hungary nga nag-imbitar sa Barangay 18.
Sa mga pungsod nga miyembro sang Association of Southeast Asian Nations ukon ASEAN suno sa punong barangay, ang Laos pa lang may yara sang imbitasyon.
Sa masunod nga tuig, indi na magpapili si Diaz bilang punong barangay apang ginpasalig sini nga magabulig siya gihapon sa Konseho agud nga madepensahan sang Barangay 18 ang ila titulo.
Gin-ako sang punong barangay nga ginhandom gid man nila nga magkampeon sa Street Dance and Arena Competitions.
Suno kay Diaz, nga ini ang labing una nga kahigayunan nga nakigbahin ang Barangay 18 sa nasambit nga kompetisyon apang duha na ka tuig nga sila ang kampeon sa Electric Masskara humalin sang tuig 2015.
Aminado ini nga dako ang pagpanghangkat sa ila bangud kagamay lang sang Barangay 18 kag nagback-out pa ang halos 50 porsyento sang ila orihinal nga mga dancers.
Bangud sini, napilitan sila nga magpatigayon sang audition kag nagkuha sang dancers nagikan sa Barangay Granada kag Estefania.
Dako man nga problema para sa Barangay 18 ang pinansyal nga kinahanglanon apang nagtinguha sila nga makapangita sang sponsors.
Suno kay Diaz, indi mag-igo ang subsidy sang city government kun amo lang ini ang ila saligan.
Sa karon, nabaton na sang barangay ang premyo apang mahimo nga kulang pa ini sa inugbayad sa ginkuha nila nga choreographers kag iban pa nga kautangan.
