Gindominar sang TNT Tropang Giga ang hampang batok sa Barangay Ginebra Gin Kings sa score nga 104-88 sa first game sang Philippine Basketball Association (PBA) Governors’ Cup best-of-seven finals.
Ang TNT ang nagsalig sa mabaskog nga starting line-up nga nakatuga sang 27-15 lead sa first quarter kag natapos ang first half sa score nga 43-37 pabor gihapon sa TNT.
Nagdangat sa 20 ka puntos ang lead sang TNT sa score nga 89-69, kag sa nabilin nga pito ka minutos kag 31 segundos sang hampang, si Rey Nambatac ang nakapasulod sang 10 ka puntos nga nagpapag-on sang kadalag-an sang Tropang Giga.
Pahayag ni TNT Head Coach Chot Reyes nga sila ang wala sang sekreto sa hampang, sa baylo ginpasanyog lamang nila ang ila depensa.
Sa iya nga una nga hampang sa PBA finals, napamatud-an ang crucial nga papel ni Nambatac pinaagi sa pagpasulod sini sang 18 ka puntos, 10 ka rebounds, pito ka assists kag duha ka steals.
Samtang si TNT import Rondae Hollis-Jefferson ang nakatipon sang 19 ka puntos, 10 ka rebounds, apat ka assists, tatlo ka blocks kag isa ka steal.
Ini ang gindugangan pa sang 15 ka puntos ni Poy Erram.
Sa pihak nga bahin nakapasulod naman si Justine Brownlee sang 23 puntos para sa Barangay Ginebra, samtang si Japeth Aguilar ang nakapasulod sang 14 puntos.
