Nabawi naman sang Barangay Granada ang titulo bilang champion sa Street and Arena Dance Competition sang MassKara Festival matapos nagpangibabaw sa 17 tanan ka mga barangay nga nagpaindis-indis kahapon sang hapon tubtub maggab-i.
Matapos ang performance kag sa paghukom sang mga hurado, gin-agaw sang Barangay Granada ang titulo nagikan sa defending champion nga Barangay Estefania.
Magluwas nga nangin grand champion, nakuha man sang Barangay Granada ang special awards nga Most Disciplined Contingent, Best in Music nga may tag-P25,000 nga cash prize kag Choice Award.
Gindala naman pauli sang Barangay Granada ang P1 million nga cash prize.
Ang Barangay Granada ang champion man sadtong tuig 2014, 2015 kag 2016.
Samtang 1st runner-up naman ang Barangay Sum-ag nga nagbaton sang P500, 000 nga cash prize kag second runner-up ang defending champion nga Barangay Estefania.
Nakuha man sang Barangay Estefania ang special award nga Best Theme and Concept nga may P25,000 nga cash prize.
3rd runner-up naman ang Barangay 35; 4th runner-up ang Barangay Singcang Airport; 5th runner-up ang Barangay Tangub; 6th runner-up ang Barangay 31; kag 7th runner-up ang Barangay Alangilan.
Sa dugang nga special awards, nakuha sang Barangay Alijis ang Best Introduction samtang nakuha naman sang Barangay Sum-ag ang Best in Mask and Costume.
