Dismayado ang newly elected punong barangay sang Barangay 20, Bacolod City sa pagturn-over sa iya sang barangay hall kun sa diin halos wala na sang gamit ang nabilin didto.
Sa interview sang Bombo Radyo kay Punong Barangay Mark Abancio, luyag sini nga makipaghinun-anon sa anay Punong Barangay agud mahusayan kun paano nga amo yadto ang sitwasyon sang barangay hall.
Iya man ginapangayo ang suporta sang mga pumuluyo sa karun nga maga-umpisa ini sa una nga pagpungko sa pwesto.
Apang, suno kay Abacion, bisan diin man ini ibutang kag bisan wala man ini sang mapwestohan, tinguhaan sini nga mahatagan sang maayo nga serbisyo ang barangay.
Dugang pa sini, ginpirmahan lamang sini ang ginturn-over sa iya nga yara didto sa barangay hall agud nga indi ini mamalayran sang wala didto.
Kasubong man nga dismayado ang re-elected nga Barangay Kagawad sa naabtan sini nga sitwasyon sang barangay hall.
Sa interview sang Bombo Radyo kay Barangay Kagawad Marissa Ciocon, may yara pa sang mga gamit didto sang nakaligad apang sa karun sa pagturn-over na, halos wala na sang gamit nga bilin.
Luyag sini nga mabalik ang iban nga gamit kag mga vehicle nga para kun tani sa mga pumuluyo.
Mensahe sini sa mga pumuluyo nga indi magkabalaka bangod yara sila sa gihapon sa pagserbisyo.
