Arestado ang Barangay Kagawad sa ciudad sang Silay sa drug buy bust operation nga ginpatigayon sa Hacienda Pipa, Brgy E Lopez, Silay City, Negros Occidental, kahapon, alas- 12:35 sang udto.
Sa interview sang Bombo Radyo kay Police Lt Mark Anthony Darroca, hepe sang Silay City Police Station, ang suspetsado ang ginkilala nga si Rany Catalan, 42 anyos, elected brgy kagawad, residente sang Sitio Hiyang-Hiyang, Brgy Patag, Silay City kag ginakabig nga High Value Individual.
Suno sa hepe, madugay na nga ginamonitor sang kapulisan si Catalan kag sa ginpatigayon sadto nga operation, napaslawan ang kapulisan nga madakpan ini.
Pahayag ni Darroca, nagabaligya sang illegal nga druga si Catalan sa mga tricycle drivers, sa mga tapasero kag kun kaisa sa mga pamatan-on.
Nakuhaan si Catalan sang pito ka heat sealed transparent sachet sang suspected shabu nga ginabanta nagabug-at sang 70 grams nga may standard drug price nga P476,000.
Pahayag ni Darroca, padayon pa ang imbestigasyon kun diin nagakuha sang suppy si Catalan apang isa sa ginalantaw diri amo ang ciudad sang Bacolod kun diin ini nalagyo sadto matapos ang ginconduct nga operation.
