Magapangayo lamang kuntani sang bulig para sa iya constituent nga nasunugan ang barangay kagawad sang Santo Ataata, Pamplona nga nalakip sa mga sibilyan nga napatay sa pagpang-atake sang armado nga mga lalaki sa puluy-an ni Negros Oriental Governor Roel Degamo kahapon sang aga.
Sa interview sang Bombo Radyo kay Punong Barangay Mary Ann Ramirez, asawa sang napatay nga si Kagawad Jose Marie Ramirez, nagpadulong sila sa puluy-an sang gobernador kahapon agud magpangayo sang bulig para sa isa nila nga constituent nga nasunugan.
Suno sa iya, isa ka oras pa sila nga nagdugay sa lugar sang hinali lamang nga nag-abot ang anum ka mga lalaki nga may bitbit nga long firearms kag nagpalupok.
Suno diri, yara siya sa atubang ni Governor Degamo samtang ang bana sini ang nagatindog sa kilid sang pwertahan.
Sang nagpaarak na sang luthang ang mga suspetsado, naghapa ini kag ang iya tupad nga nagahapa man ang nakit-an sini nga may dugo na.
Suno kay Ramirez, maayo lamang bangud wala ini naigo apang pagtindog sini, ginhakos sini ang iya asawa apang wala na ini sang kabuhi kag may igo sang bala sa dughan.// Hustisya ang ginapanawagan sang punong barangay sa natabo sa iya bana.
