Gilayon nga gindakop ang 44-anyos nga lalaki nga isa ka Person Under Monitoring (PUM) sa ciudad sang Sipalay matapos nga iya ginhaboy sang mug nga may kape kag ginbuyayaw ang 61-anyos nga barangay health worker matapos siya ginsaway nga nagatambay sa kapehan sa Barangay Cayhagan, Sipalay City Miyerkules sang aga.
Ang BHW ang ginkilala kay Februarita Sarol, 61-anyos samtang ang suspetsado ang ginkilala kay Amir Ferrer, 44-anyos kag lunsay residente sang nasambit nga barangay.
Santo sa imbestigasyon, ginsaway ni Sarol si Ferrer bangud nagapangape ini sa isa ka kapehan.
Ginpaintindi sang BHW sa PUM nga dapat magpauli na ini bangud naka-home quarantine siya.
Apang sa baylo nga magpati, naakig ini kag ginhaboy ni Ferrer ang iya ginabitbit nga tasa nga may kape sa BHW kun sa diin naigo ini sa tiil.
Gilayon naman nga gindakop ang PUM kag ginpasakaan sang kaso nga physical injury kag oral defamation subong man pagbayolar sa ginapatuman nga mandatory home quarantine.
Nahibaluan nga nagpangisda sa iban nga lugar ang suspetsado gani nga gin-PUM ini.
Samtang, gindakop man ang isa ka barangay kagawad nga PUM matapos makit-an nga nagalagaw sa amo man nga lugar sang Miyerkules sang gab-i.
Ginkilala ang barangay kagawad kay Redine Olac, 29-anyos.
Nakabaton sang impormasyon ang kapulisan nga yara sa gwa si Olac apisar nga dapat naka-home quarantine ini.
Naabtan naman sang otoridad ang kagawad kag gilayon nga gin-aresto.
Natalana man ini nga pasakaan sang kaso nga paglapas sa home quarantine.
