Napatay sang isa ka Kagawad sa Barangay Basak, Cauayan, Negros Occidental ang iya man mismo nga manghod matapos nga iya ini ginluthang sang siya ang una nga ginlabo dala sang kahulugbon.
Ang biktima ang ginkilala kay Richard Caballero, 49 anyos samtang ang suspetsado ang ginkilala kay Freedie Caballero 51 anyos lunsay mga residente sa Purok 5, Barangay Basak, Cauayan.
Suno kay P/Maj. Roberto Indiape, hepe sang Cauayan Municipal Police Station, si Richard ang nakainom sang makahulubog nga ilimnon kag ini ang nagamaoy bitbit ang binangon.
Gintinguhaan naman ini nga ma-pacify sang iya nga magulang apang hinali nalang nga ginlabo sang biktima ang Barangay Kagawad nga magulang.
Si Freedie ang nakaangkon sang pilas sa nawala nga butkon bangod sa pagpanglabo.
Nakita naman sang suspetsado nga wala sang pagduhaduha nga siya ang pagapatyon sang iya nga manghod, gani nagkuha man ini sang armas-luthang kag gintiro sang makatatlo ka beses ang biktima nga na-igo sa nagkalainlain nga bahin sang lawas kag gintunaan sang iya nga kamatayon.
Boluntaryo naman nga nagsungka sa Cauayan Municipal Police Station ang Barangay Kagawad kag sa karun ginahulat pa kun magapasaka sang kaso ang ila pamilya.
