Patay ang isa ka Barangay Kagawad sa ciudad sang Guihulngan, Negros Oriental matapos ginluthang sang wala pa nakilal-an nga mga miyembro sang New People’s Army (NPA) kahapon sang hapon.
Sa impormasyon nga nakuha sang Bombo Radyo, nagabantay sang iya nga baka sa iya uma sa Upper Muog, Brgy. Planas, Guihulngan City ang biktima nga si Elpedio Julwar Mahinay, 65 anyos kag residente sang Sitio Maambog sa nasambit nga barangay, sang hinali lang nga nag-abot ang wala nakilal-an nga mga suspetsado nga gina-alegar mga miyembro sang NPA kag gintiro ini sang makapila ka beses.
Bangud sa kadamuon sang igo, gilayon nga ginbawian sang kabuhi si Mahinay.
Antes magpalagyo, nagsinggit pa ang mga suspetsado sang “nagpagamit man gud mo sa army ug gobyerno” kag gilayon nga nagdalagan padulong sa bukid.
Sa karun, nagapadayon pa ang imbestigasyon sang kapulisan tuhoy sa insidente.
