Barangay kagawad sa Hinigaran, pilason matapos ginbuno sang isa ka mananagat

Pilason ang isa ka barangay kagawad sa banwa sang Hinigaran matapos nga ginbuno sang mananagat samtang naga-inom sang makahulubog nga ilimnon, sang Martes, alas- 11:00 sang gab-i.

Ang biktima ang ginkilala nga si Kagawad Dan Diaresco sang Barangay 4, samtang ang suspetsado naman amo si Ping-ping Toledo nga residente sang Barangay 1.

Sa interview sang Bombo Radyo kay Police Major Clifford Batadhay, hepe sang Hinigaran Municipal Police Station, kaupod ni Daresco ang iya pakaisa nga naga-inom inom sang hinali lang nga nagpalapit si Toledo kag ginbuno si Diaresco sa wala mahibaluan nga rason.

Nag-agom sang igo sa dughan si Diaresco nga gilayon nga gindala sa ospital kag sa karun yara na sa estable nga kondisyon.

Samtang, nalagyo naman ang suspek.