Patay ang Barangay Kagawad sa Barangay Banago, Bacolod City matapos malapakan sang trailer truck sa San Juan Street, Purok Maabi-abihon sa nasambitan nga Barangay pasado alas-12:00 subong nga udto.
Ang biktima ang ginkilala nga si Kagawad Joemarie Maniego.
Sa interview sang Bombo Radyo Bacolod kay Rodrigo Ricarder, 59 anyos, driver sang trailer truck, malayo palamang nakita na sini nga hana mag-uturn ang biktima tabok sa center island padulong sa ila nga lane.
Apang bangod mahinay lamang ang iya dalagan, ilabi na nga aminado ini nga madamo sang salakyan sa nasambitan nga area, wala ini naglaom nga sa paglabay sini magadungan ang motorsiklo sa likod nga bahin sang iya trailer.
Bangod may karga si Maniego nga sako nga naga-unod sang butate cannisters, ginalantaw nga ini ang nasalawid sa trailer truck.
Aminado si Ricarder nga nakita sini sa side mirror nga nagabalang-balang na ang motorsiklo gani siya ang nagprino, apang natumba na ang biktima kag nagdasok sa idalum sang truck.
Si Maniego ang napilpilan sang motorsiklo kag nalapakan sang likod nga royda sang trailer truck, kag ini ang dead on the spot.
Matapos makita ang sitwasyon, gilayon man nga nagpalapit ang driver sa mga kapulisan nga yara sa kapehan nga amo ang nagdireher sang trapiko.
Naglihog na lamang ini sa abyan nga malapit sa area sa pagcontact sa ila opisina.
Ang trailer truck ang wala naman sang karga bangod ini ang natalana na kuntani nga maggarahe.
Nagpangayo sang pasaylo si Ricarder sa pamilya sang biktima, bangod sa natabo nga insidente.
Ginakasubo man sini nga kuntani nagpondo anay ang barangay kagawad, ilabi na nga ini ang may karga.
