Patay ang isa ka barangay kagawad matapos nga ginluthang kahapon sang kaagahon sa Brgy. Dancalan, Ilog, Negros Occidental.
Sa interview sang Bombo Radyo Bacolod kay Police Major Joseph Partidas, Chief of Police sang Ilog Municipal Police Station, nakabaton sila sang impormasyon nagikan sa mga Barangay Tanod sa nasambit nga barangay nga may nasapwan nga nagakaya nga tawo kag ginalantaw nga wala na sang kabuhi.
Suno kay Partidas, ginpadulungan sang mga kapulisan ang lugar kun sa diin nasapwan ang bangkay agud nga ivalidate ang report kag magpatigayon sang imbestigasyon kun sa diin ang g ginkilala ang biktima nga si Joselito Magallanes, 60-anyos kag incumbent kagawad sang nasambit nga barangay.
Suno sa hepe may yara sang nagluntad nga insidente antes pa man ginpatay ang biktima.
May yara na sila sang lead sa imbestigasyon kag person of interest apang indi pa sang mga ini mapalayag sa kahanginan bangud nagapadayon pa ang imbestigasyon sa insidente.
Suno kay Partidas, nagatipon na sila sa karun sa mga ebidensya kag dugang pa nga mga witnesses agud nga makatudlo kag makapamatuod nga ang nakita nga person of interest ang suspetsado sa pagpatay sa biktima agud nga mafile na ang reklamo sa prosecutors office.
Suno sa hepe sa karun may yara na sang developments bangud may nagkooperar na nga mga pumuluyo sa imbestigasyon.
Suno diri, ginpahayag sang witness nga ang suspek ang nagwa sa isa ka establismento kun sa diin ginluthang ang Barangay Kagawad.
Santo sa resulta sang postmortem examination nga ginpatigayon sa bangkay sang biktima nakaagom ini sang pilas sa likod sang dulunggan kag nag-stock sa iya nga bag-ang.
Wala pa matumod ang kalibre sang armas-luthang nga gingamit sa pagpatay sa biktima.
Nagapadayon sa karun ang imbestigasyon sa kaso kag ginalantaw sang kapulisan sa Ilog nga indi man magdugay masolbar na ang kaso.
