Masobra P1 million nga balor sang illegal nga druga ang nakumpiskar sa buybust operations nga ginpatigayon sang Philippine Drug Enforcement Agency (PDEA) Region 6 sa Buri Road, Brgy. Mandalagan, Bacolod City alas 3:00 kahapon sang hapon.
Sa interview sang Bombo Radyo kay Agent Bamboo, team leader sang nasambit nga operasyon, malapit duha ka semana na nila nga ginamonitor ang mga subject person nga sanday Michael Astorga, isa ka Brgy. Kagawad sa Brgy Zone 12-A, Talisay City kag Dino Dimson apang nakuhaan man sang illegal nga druga si Cris Angelo Abelarde nga kaupod sang duha.
Nahibaluan nga si Astorga ang bata man ni anay Talisay City Councilor Zenia Astorga.
Suno kay Agent Bamboo, kahapon, nagpatigayon sila sang entrapment operation kag natigayon ang madakpan ang mga suspetsado.
Nakuha sa ila paghinakop ang 15 tanan ka mga medium heat sealed plastic sachet sang suspected shabu; isa ka big pack knot tied transparent plastic sachet sang suspected shabu; kag napulo ka mga small heat sealed plastic sachet sang suspected shabu.
Ang nakumpiskar nga illegal nga druga ang ginabanta nagabug-at sang 150 grams.
Magluwas diri, nakuhaan man ang mga suspetsado sang P14,000 nga buybust money, isa ka weighing scale, mga cellphone kag improvised tooter.
