Arestado ang isa ka Barangay Kagawad sa ciudad sang Victorias matapos nga ini ang makuhaan sang iligal nga droga sa vicinity sang Victorias Milling Company sang Hulyo 24.
Ginkilala ang nadakpan kay Clooven Laguna, 33-anyos kag residente sang Natividad St. Canetown Subdivision, Barangay 19-A ciudad sang Victorias.
Sa interview sang Bombon Radyo Bacolod kay Police Captain Genus David, ang Deputy Chief of Police sang Victorias City Police Station, pasulod na kuntani sa iya nga trabaho si Laguna apang ini ang ginrekisa sang security guard kag didto nakuha ang isa ka gina-alegar tooter.
Suno kay David, gin-hold si Laguna sa opisina kag liwat ini nga ginrekisa sang kapulisan kag nakuha ang 14 tanan ka mga sachet sang shabu nga nagabug-at sang 0.5 gramos kag ini ang may balor nga P3,400.
Suno sa impormasyon nga nakuha sang mga kapulisan si Laguna ang aktibo nga Barangay Kagawad kag First termer pa lang ini.
Sa karon priso na si Laguna kag natalana nga pasakaan sang kaso nga paglapas sa sec. 21 sang RA 9165 ukon Comprehensive Dangerous Drugs Act of 2002.
Samtang nakadepende na sa Department of the Interior and Local Government (DILG) ang sanction sini bilang Barangay Kagawad.
