Nagapasalamat naman ang Barangay Kagawad sang Barangay San Miguel, La Carlota City nga nakahatag na ang ciudad sang tubig nga mahimo maimnan kag gawion sang mga pumuluyo matapos nga ang ila water source ang napuno sang asupre nagikan sa pag-alburuto sang Bulkan Kanlaon.
Sa interview sang Bombo Radyo Bacolod kay Barangay Kagawad Cora Oliveros, maayo ayo na ang ila nga sitwasyon bangud nakahatag na si La Carlota City Mayor Rex Jalando-on sang tubig kag mga galamiton sang mga residente.
Suno kay Oliveros, kahapon sang aga may yara man sang nag-evacuate gikan sa lugar bangud sa madamol nga asupre kag ang iban may yara sang ginabatyag kaangay sang asthma.
Ang ginpadulungan sang mga ini ang pamilya sa Bacolod kag kun sa diin pa nga mahimo kadtuan.
Pito man ka areas sa Barangay San Miguel ang apektado sang ashfall.
Ang water source sang mga residente nga nagikan sa Ara-al ang indi magamit bangud sa asupre nga ginbuga sang Bulkan.
Suno sa Barangay Kagawad, paawason naman ang tubig sa mga bubon antes liwat nga gamiton agud nga makakas ang asupre.
Suno diri, ang ciudad na ang nagahatag sang tubig agud ipanghugas sang mga pumuluyo sa ila mga hulugasan kasubong man sang mainum.
