Gindeputize na sang Commission on Elections (Comelec) ang mga barangay officials, agud nga magserbe bilang monitoring team karun nga nag-umpisa na ang Campaign Period para sa National position kahapon.
Suno kay Negros Occidental Provincial Election Supervisor Atty. Roberto Salazar, kalakip sa mga pagabantayan sang mga Barangay officials ang pagpatuman sang mga kampanya sang mga kandidato sa nasyunal kaangay nalang sang Public Rallies, Motorcade, Miting de Avance kag iban pa, ilabi na kun nagakasunod ang minimum health protocols.
Madumduman nga una na nga ginpahayag kahapon ni Atty Salazar nga lainlain ang capacity sang makatambong sa mga aktibidad santo sa Alert Level Status sang isa ka local government unit (LGU).
Dugang pa sang Provincial Election Supervisor nga kinahanglan magkuha sang permit ang mga kandidato sa Regional Comelec Campaign Committee agud nga makapatigayon sang kampanya.
Sa pihak nga bahin, umpisahan naman ang “Task Force Operation Baklas” sang Comelec kun sa diin pagapaluson ang mga oversized nga campaign materials.
Apang pasalig sini nga indi gilayon paluson ang mga wala nakasunod sa standard nga 2×3 feet size, kundi pagatawagan ang mga kandidato kag hingyuon nga paluson nila ang mga campaign materials.
Samtang ang mga Barangay officials naman ang pagahatagan sang papel sa pagmonitor kun nagakatuman ang nagakaigo nga health protocols.
Ang mga ini ang ginmanduan man nga gilayon nga ireport kun may bayolasyon ang mga kandidato.
Paathag ni Atty Salazar nga ang magareport sang indi matuod nga impormasyon ang magapanabat sa Department of Interior and Local Government (DILG).
