Gin-athag sang regional director sang Police Regional Office 6 nga ang mga barangay officials nga yara sa drug watchlist nga una na ginreport ang ginbase pa sa report sang Duterte administration.
Suno kay Police Brigadier General Sidney Villaflor, ang mga ginapahayag nga may yara sang 40 ukon 50 ka mga barangay officials nga yara sa drug watchlist ang ginbase pa sa daan nga record.
Ginpahayag man sini nga indi sila makahimo sang ila luyag nga mga ipatuman bangud ginahulat sang mga ini ang polisa ukon mando nagikan sa Commission on Elections (COMELEC).
Suno kay Villaflor, sa tion sang election ang COMELEC ang masunod kag indi makahimo sang kaugalingon nga tikang ang Armed Forces of the Philippines kag Philippine National Police.
Ginpahayag man sini nga kabahin man sang ila nga monitoring nga ginapatigayon amo ang mga elected kag candidates nga barangay officials.
