Nadugangan pa ang mga ginkasuhan sang Criminal Investigation and Detection Group (CIDG) bangud sa gina-alegar anomaliya sa first trache sang Social Amelioration Program (SAP) distribution.
Sa impormasyon nga nakuha sang Bombo Radyo Bacolod, napulo ka mga Barangay Officials sang Brgy. Mansilingan, Bacolod City ang ginpasakaan sang kaso sang CIDG-Bacolod kahapon.
Magapangatubang sang kaso nga paglapas sa Republic Act (RA) 3019 ukon Anti-Graft and Corrupt Practices Act, RA 6713 ukon ang Code of Conduct kag Ethical Standards for Public Officials and Employees, kag RA 11469 ukon ang Bayanihan to Heal as One Act sanday Punong Barangay Rodolfo Pico, Barangay Secretary Edward Menesis, mga Purok Presidents nga sanday Julius Villaflor kag Victorious Christally Valenzuela, Purok Kagawads Gina Gilbor, Amelita Mondejar, Gregorio Beniten, Lourdes Palma, Anabelle Javier, kag Mercedes Rory Capunong.
Ang mga ginkasuhan nga miyembro sang Barangay Selection Process Team ang may kaangtanan sa anomaliya sa pagpili sang qualified beneficiaries sa pag-avail sang Social Amelioration Program (SAP) sadtong Abril 24-30.
