Nagbaton sang award ang Barangay Singcang-Airport sang ciudad sang Bacolod matapos nga ginkilala bilang tagdaog sang CY 2024 Lupong Tagapamayapa Incentives Award gikan sa Department of the Interior and Local Government – Bacolod.
Sa interview sang Bombo Radyo kay Punong Barangay Atty Caesar Ditrito, gintinguhaan sang barangay nga mapanubo ang numero sang mga kaso nga ginapasaka sa korte paagi sa pagsettle na lamang ini sa barangay.
Suno diri, tuman ang iya kalipay nga sa tanan nga barangay sa ciudad, ang Barangay Singcang-Airport ang nangin tagdaog apisar nga ini ang barangay nga may pinakamadamo nga kaso.
Kalabanan naman sa mga konflikto ang magagmay lamang kaangay sang utang, kutso-kutso, propreidad kag boundary dispute.
Ini ang ginatinguhaan sang barangay nga masolbar agud nga indi na magdako pa.
Sa karun, nagaproseso na ini para naman sa regional competition, kag kun sila ang magadaog sila ang mangin representante sang Western Visayas sa national competition naman sa Malacanang.
