Ginkompirmar sang punong barangay sang Barangay Sum-ag, Bacolod City nga gin-umpisahan na subong nga adlaw ang pagpanagtag sang Home Quarantine Pass (HQP) matapos sini mapirmahan.
Sa interview sang Bombo Radyo Bacolod kay Punong Barangay Rodney Carmona, kapin anom ka libo nga mga HQPs ang ginpirmahan niya kag gin-amat-amat na sang mga Barangay Kagawad kag Barangay Health Emergency Response Team (BHERT) members ang pagpamalay-balay agud mahatag ang home quarantine pass.
Nahibaluan nga magarequire naman sang HQP ang syudad sang Bacolod humalin sa Setyembre 3 tubtub Setyembre 15 kadugang sang pagbutang sang mga border control check-up points agud malimitahan ang hulag sang mga tawo kag tikang sa pagtapna sang pagdamo sang kaso sang COVID-19.
Tatlo ka pangalan ang ibutang sa HQP bangud tatlo lang ang makausar sini.
Suno kay Carmona, mangin instrikto man sila sa paghatag sang home quarantine pass bangud man sa nagadamo nga kaso sang COVID-19 sa syudad.
Suno pa diri, indi na magpila ang mga residente kundi idul-ong lang sa ila balay.
Nagpanawagan man ini sa mga pumuluyo sang Barangay Sum-ag nga magsunod sa ginapatuman nga health protocols.
Samtang ginahulat na lamang sang Bacolod City Police Office (BCPO) ang Executive Order nga ipagwa sang alkalde agud mahibaluan ang guidelines sa pagpatuman sang border check-up point halin Setyembre 3 tubtub 15.
Sa interview sang Bombo Radyo kay BCPO spokesperson Police Lt. Col. Ariel Pico, ginmanduan na sang City Director sang BCPO kanday Police Lt. Col. Lester Leada kag Police Major Leo Logronio angot sa ibutang nga walo ka mga outer border checkpoints kag 27 ka mga inner border check-up points.
Suno kay Pico, handa ang BCPO sa pagsuporta sa pagpatuman sang mga tikang sang Local Government sang Bacolod agud matapna ang paglapta sang coronavirus disease 2019 sa syudad.
Aminado man si Pico nga kulang ang pwersa sang kapulisan kun standard nga data ang basehan apang ginpasiguro sini nga may yara sang nagakaigo nga pwersa ang BCPO nga makabantay sa mga boder check points sang syudad.
Ginalauman man ni Pico nga indi na maliwat ang natabo sang nakaligad nga pagpatuman sang paggamit sang HQP nga madamo ang nagreproduce gani sa baylo nga malimitahan ang pagdamo sang tawo, baliskad ang natabo.
Samtang, ginpahayag man ni Pico, nga may yara sang personnel ang BCPO nga nagpaidalom sa mass testing kag ginapangamuyo sini nga wala na sang magpositibo agud indi madugangan ang kapulisan nga natapikan sang balatian.
