Nagaapelar ang punong barangay sang Barangay Taculing, Bacolod City sa mga pumuluyo nga maghimo sang mga tikang agud malikawan ang pagdamo sang kaso sang dengue sa ila lugar.
Sa interview sang Bombo Radyo kay Councilor Lady Gles Palen, nga amu man ang presidente sang Association of Barangay Captains sa Bacolod, nagpatigayon sila sang operasyon sa mga public areas sa barangay kag nakighinun-anon sa mga pumuluyo agud malikawan ang paglapta sang dengue.
Sa data nagikan sa City Health Office – Environment and Sanitation Division, ang Barangay Taculing ang isa sa mga hotspot areas sa Bacolod bangud apat ka semana na nga wala naganubo ang kaso sang dengue kag may yara sang 31-anyos nga fatality.
Suno kay Pallen, ang Taculing ang ikatatlo sa may pinakamadamo nga populasyon sa ciudad kag nagasunod sa Barangay Mansilingan kag Estefania.
Suno diri, malapad ang Taculing bangud kapin 40,000 ka mga residente ang nagapuyo sa 28 ka mga purok kag 18 ka mga subdivision sa barangay.
Suno sa iya, ila lamang ginatumod ang mga areas nga patigayunan sang fogging apang ini ang wala ginarekomendar sa mga may problema sa tagipusuon kag hypertension.
Sa pagtapna sang dengue, mas ginarekomendar sini ang wala aso, wala polusyon kag wala baho gani ginahangkat sang punong barangay ang mga pumuluyo nga magpaninlo, ipractice ang 4 o’clock habit kag ulaon ang mga stagnant waters nga posible tiniran sang lamok.
