Posible nga magapatuman sang barangay isolation sa Barangay Tangub, Bacolod City agud malikawan ang paglapta sang African Swine Fever sa ciudad.
Suno kay Bacolod City Administrator Atty. Pacifico Maghari, kun may sintomas sang ASF ang isa ka baboy, ginalantaw ang posibilidad nga macontain ini gilayon apisar nga ginaconfirm pa ang resulta.
Suno sa iya, posible nga magpatuman sang barangay isolation apang sa karun wala pa sang deklarasyon kag si Mayor Alfredo Benitez lamang ang opisyal nga makadeklarar sini basta nagikan sa Bureau of Animal Industry ang kumpirmasyon.
Suno kay Maghari, wala pa nakasubmit sang report ang barangay kag city veterinarian apang indi gid man tuman ka damo ang insidente nga nareport kun sa diin apektado ang mga hog raisers.
Sa karun, suno diri, nagafocus ang council sa preparedness kag prevention measure agud indi na maglapta pa ang ASF sa ciudad.
Mas ginpasanyog naman sang ciudad ang pagtsekyar sa mga barangay kag ginalantaw ang posibilidad sang pagpatuman sang sanctions sa mga nagahaboy kag nagahal-id lamang sang patay nga baboy kun diin-diin.
Suno kay Maghari, ginarekomendar ang pagpatuman sang sanctions kag dapat magpasar sang nagakadapat nga executive order nga magamando kun pila ang penalidad sa mga nagahimo sini.
Suno sa iya, kun mapatyan sang baboy ang isa ka hog raiser, dapat gilayon niya ini nga ipahibalo sa barangay ukon sa city liason agud mapahibalo man ang City Veterinarian.
Suno sa sa iya, dapat nga i-kordon anay ang area kag hulaton ang City Veterinarian agud mag-implementar sang nagakaigo nga protocols.
