Nagpangayo sang paathag ang 57-anyos nga lalaki nagikan sa Barangay Tangub, Bacolod City tuhoy sa pagparehistro sa BACTRAC matapos ini ginsukot sang P35 sang siya ang nagpadulong sa ila barangay hall makaangkon sang ID.
Kahapon, nagpadulong sa estasyon sang Bombo Radyo si Alyas Boy, residente sang Barangay Tangub, Bacolod City, agud mamangkot kun may bayad gid man kun magparehistro sa BACTRAC.
Suno kay Alyas Boy, bangud nga wala ini nakahibalo kun paano magparehistro sa system, nagpadulong ini sa ila barangay agud magpabulig apang gin-abisuhan siya nga kinahanglan magbayad P35 para makaparehistro kag maprintahan sang ID nga iya sarang makuha pagka-Lunes.
Gani natingala ang 57-anyos bangud nabatian sini sa radyo nga libre ang magparehistro kag kinahanglan lang sang internet connection.
Apisar sini, naghatag nalang si Alyas Boy sang P100 kag wala pa sini makuha ang sensilyo.
Gin-athag naman si Bacolod City Administrator Em Ang nga wala sang bayad ang magparehistro sa BACTRAC bangud gadget kag internet connection lang ang kinahanglan.
Suno kay Ang, kun wala sang access sa mga ini, sarang nga makakadto ang pumuluyo sa barangay agud magpabulig sa pagparehistro kag print sang ID apang wala ini sang bayad.
Nagpasalig man ang city administrator nga gilayon ini nga magapakig-angot sa Barangay Tangub agud klaruhon ang natabo.
