Barangay tanod, ginbuno sang lalaki nga may diperensya sa paminsaron sa Granada; suspetsado natiruhan

Pilason ang barangay tanod matapos ginbuno sang lalaki nga ginaalegar may diperensya sa paminsaron samtang pilason naman ang suspetsado matapos gintiro sang kaupod sang barangay tanod sa Providence Negros, Brgy. Granada, Bacolod City kagab-i.

Sa impormasyon nga nakuha sang Bombo Radyo, nagabantay sa guard house and duha ka barangay tanod sang hinali lang nga may nagpalapit nga lalaki kag ginbuno ang isa sa ila.

Agud luwason ang iya upod, gintiro sang isa ka tanod ang suspetsado.

Gilayon nga gindala sa ospital ang nabun-an nga tanod kag natiruhan nga suspetsado nga ginaalegar may deperensya sa paminsaron.

Sa karun, nagapadayon pa ang imbestigasyon sang kapulisan agud matumod ang identity sang suspetsado.